Kaupapa: Whai poaka, whai tia – Toa Hunter Gatherer i Kaikōura
Ināhea: 6th Hereturikōkā 2021
Kaiaruaru: Ko Korey Gibson, ko Waitohi Gibson, ko Hemi Hoskins, ko Owen Boynton me te whānau o Toa Hunter Gatherer
Kurī whaipoaka: Ko Rocky, rātou ko Tā, ko Niwha, ko Namunamu
Te Taumaha o te poaka: He tāriana - 112lb
I ahatia?: I tae atu au, mātou i te pō ki te ngahere, a muri i te hokohoko o ngā taputapu hei whakarite i ngā āhuatanga kei te haere. Mā runga motopaihikara, waka ngahere anō hoki mātou haere atu ai ki te whare puihi o Kevin, āhua 7km te tawhiti mai i te kēti.
I whakarite ngā moenga me ngā taputapu, i whakakā te ahi, hei whakamahana te whare.
Hīkaka a Waitohi kia moe ngahere anō – heoi, i rō whare i tēnei haerenga, ki a ia, pai ake i ngā tāwharau.
Nui ngā kōrero, reka ngā kai tōtiti, kaha rawa te mahi ngongoro a ngā hoa Toa – e hika! Kua tae mai te mīhini kani!
Kāore mātou i moe roa, i oho wawe, i whakarite kurī, ko Hemi te pāwhakawairua – nāna te karakia i tuku, heoi, kua rite – me haere.
Ko te “Ara Urunga” te pokapū tuatahi kia kimi poaka, kei “Hemi’s Gully” te pokapū mā Hemi mā kia whai tia, nā wai, nā wai, ka oma atu ngā kurī ki tawhiti, wāhi paripari, wāhi teitei, heoi, ka whai atu a Korey ki tana kotahi – nā te āhua o te whenua, tē taea e te toenga te whai, i ngau ngā kurī he uwha, āhua 60lb te rahi – heoi he tīmatanga pai.
I taua wā hoki, i pū a Hemi he tia, he uwha, he fallow – inā kē te angitu mō te kāhui aruaru nei!
I huitagi mātou te kāhui i te hiwi, nā Hemi te mōhiotanga o ngā poaka i tuku – kua kitea kētia e rāua ētehi, ko tētahi he tāriana – he rīrā!!
Heoi, me whai mātou! Kua hipa te kōtahi hāora, ka ngau i ngā kurī te tāriana – nui te whawhai, āhua 800m – 1km te tawhiti – he oma atu mātou ki te wāhi pakanga! I te taenga atu a Korey – kua whara a Rocky nā ngā rei tāriana – nā Korey i oko te pōaka, i tangohia e ia te kauae raro, kātahi ka hoki atu ki te motopaihikara – ka mutu, ki te tākuta kararehe i te tāone.
Hei te rā whai muri, āhau 5am, ka hoki atu a Korey, ko Owen, ko Hemi kia tiki ai te tāriana – hei te poupoutanga o te rā – kua ea! 112lb te rahi o te tāriana – engari ko tōna kaha pērā i tētahi 150lb!
I noho a Rocky i te tākuta kararehe mō te wiki katoa, kia whakapiki tōna ora. Anei te kōrero mō “Te Āpōpō Boar”. Mauri ora!
